Eltir John Terry Eið Smára til Kína?

John Terry og Eiður Smári Guðjohnsen spiluðu saman í mörg ár hjá Chelsea og nú gæti fyrirliði Chelsea mögulega verið að elta íslenska landsliðsmanninn til Kína ef marka má frétt hjá Daily Mirror.

Terry er búinn að missa sæti sitt í byrjunarliði Chelsea en hann er orðinn 34 ára gamall og hefur verið fyrirliði Chelsea frá 2004 eða í meira en áratug.

Framtíð Terry á Stamford Bridge er því í uppnámi, að minnsta kosti í ensku blöðunum, þótt að forráðamenn Chelsea gefi ekki neitt upp.

Eiður Smári Guðjohnsen er einn af frægum leikmönnum úr ensku úrvalsdeildinni sem hafa skellt sér í kínverska boltann og nú getur Terry valið úr tilboðum frá kínverskum liðum samkvæmt umræddri frétt Daily Mirror.

Samningur John Terry og Chelsea rennur út í sumar en miðvörðurinn hefur verið ónotaður varamaður í síðustu fjórum leikjum Chelsea í ensku úrvalsdeildinni og Meistaradeildinni.

Terry byrjaði inná í fyrstu þremur leikjum Chelsea í ensku úrvalsdeildinni en fékk rautt spjald í þriðja leiknum sem var á móti West Brom.

Chelsea tapaði síðan 3-1 á móti Everton í fyrsta leik hans eftir leikbannið og Jose Mourinho hefur siðan ekki gefið fyrirliða sínum eina mínútu í aðalkeppnunum tveimur þótt að Terry hafi spilað á móti Walsall í enska deildabikarnum. Everton-leikurinn fór fram 12. september síðastliðinn.

Eiður Smári Guðjohnsen spilar með Shijiazhuang Ever Bright en ekki kemur fram í frétt Mirror hvort að það lið sé eitt af þeim sem hefur borið víurnar í Terry.

Svíinn Sven-Göran Eriksson þjálfar lið Shanghai SIPG en það var einmitt hann sem tók Terry fyrst inn í enska landsliðið árið 2003.

Eina evrópska liðið sem er nefnt á nafn er tyrkneska félagið Fenerbahce en með því spila einmitt Robin van Persie og  Nani, báðir fyrrum leikmenn Manchester United.