Mourinho um Terry: Það eru allir leikmenn Chelsea meira en ánægðir að fá að spila

José Mourinho, knattspyrnustjóri Chelsea, sagði á blaðamannafundi í gær að John Terry, fyrirliði liðsins, er gíraður fyrir að mæta Walsall í deildabikarnum í kvöld.

Terry, sem er í fyrsta sinn á sínum Chelsea-ferli að upplifa það að vera varamaður, sat allan tímann á bekknum gegn Arsenal í stórleik síðustu umferðar í ensku úrvalsdeildinni.

Enskir blaðamenn voru fljótir að búa til ríg á milli hans og Mourinho sem Portúgalinn var fljótur að vísa til föðurhúsanna eftir leikinn.

„Auðvitað mun reynsla Johns hjálpa okkur gegn Walsall,“ segir Mourinho í viðtali á heimasíðu Chelsea.

„Hann spilaði ekki síðasta leik þannig hann er ferskur og gíraður í að spila. Það sama gildir um Radamel Falcao.“

„Chelsea er Chelsea og að klæðast bláu treyjunni fylgir ábyrgð. Allir leikmenn Chelsea eru meira en ánægðir að fá að spila,“ segir José Mourinho.