Nýtt útspil frá Blatter: Ég sagði ekki af mér

Sepp Blatter, nýkjörinn forseti FIFA, er kannski ekki að fara að hætta eftir allt saman ef marka má nýjasta viðtalið við hann.

Blatter var endurkjörinn forseti FIFA í miðju fjölmiðlafári í lok maímánaðar en aðeins nokkrum dögum síðar gaf hann það út að hann ætlaði að hætta og boða til nýrra forsetakosninga.

FIFA hafði fengið á sig mikla gagnrýni í kringum þingið og háttsettir menn innan sambandsins höfðu verið handteknir skömmu fyrir FIFA-þingið. Blatter stóð það hinsvegar af sér og var endurkjörinn þrátt fyrir harða mótstöðu frá UEFA-ríkjum.

Nú virðist vera komið aðeins annað hljóð í þennan 79 ára gamla Svisslending sem hefur verið forseti Alþjóðaknattspyrnusambandsins síðan 1998.

„Ég sagði ekki af mér. Ég setti mig sjálfan og mitt starf í hendurnar á FIFA-þinginu," sagði Sepp Blatter í viðtali við svissneska blaðið Blick.

FIFA hefur nú staðfest að rétt hafi verið haft eftir forseta FIFA í umræddu viðtali og það væri ekki í fyrsta sinn sem hann siglir í gegnum öldusjó með segja eitt og gera síðan allt annað þegar á hólminn er komið.

„Við getum staðfest það að rétt er haft eftir Blatter í Blick. Hinsvegar er hann að tala á sömu nótum og hann gerði i í ræðu sinni 2. júní," segir í yfirlýsingu frá FIFA.

Nýjar forsetakosningar áttu að fara fram sem fyrst og fara væntanlega fram í lok þessa ár eða í maí 2016. Það gæti farið svo að Blatter verði þar í framboði eins og 2002, 2007, 2011 og 2015.