Íslendingalið hefði getað selt leikmenn fyrir 800 milljónir króna í sumar

Íslendingaliðið Rosenborg er með sjö stiga forskot á toppi norsku úrvalsdeildarinnar í fótbolta og það bendir allt til þess að titilinn sé að koma aftur til Þrándheims.

Með Rosenborg spila íslensku leikmennirnir Hólmar Örn Eyjólfsson og Matthías Vilhjálmsson og þá eru hjá liðinu einnig Alexander Söderlund og André Hansen sem spiluðu báðir á Íslandi.

Verdens Gang segir frá því að forráðamenn Rosenborg hafi hafnað mörgum tilboðum í sína leikmenn í sumar en erlend félög höfðu áhuga á mönnum eins og Pål André Helland, Alexander Söderlund, Ole Selnæs og Jörgen Skjelvik.

Rosenborg hefði getað fengið yfir 800 milljónir íslenskra króna í kassann hefði félagið samþykkt að selja þessa menn en þar á bæ leggja menn ofurkapp á að vinna fyrsta norska titil Rosenborgar í fimm ár.  Rosenborg varð síðast Noregsmeistari 2010 en síðan hafa Molde (3 sinnum) og Strömsgodset unnið gullið.

„Við hefðum getað grætt mikið. Það eru hinsvegar stuðningsmennirnir sem hafa fjölmennt á Lerkendal-völlinn okkar í sumar sem sjá til þess að við getum haldið þessum leikmönnum í okkar liði," sagði Kåre Ingebrigtsen, þjálfari Rosenborg, við Verdens Gang.

Rosenborg varð sextán sinnum meistari í Noregi frá 1992 til 2010 og hefur unnið norsku deildina oftast allra félaga eða alls 22 sinum.

Rosenborg er ekki bara með gott forskot á toppnum því liðið er einnig komið í undanúrslit bikarkeppninnar eftir 4-0 sigur á Mjöndalen í átta liða úrslitunum þar sem Matthías Vilhjálmsson skoraði eitt markanna. Rosenborg mætir Stabæk á heimavelli sínum í undanúrslitunum.