Einn efnilegasti framherji Evrópu á leið til Newcastle

Samkvæmt frétt Daily Mail hefur Newcastle United komist að samkomulagi við Anderlecht um kaup á serbneska framherjanum Aleksandar Mitrovic.

Talið er að kaupverðið sé 13 milljónir punda en Mitrovic mun væntanlega gangast undir læknisskoðun hjá Newcastle á næstu dögum.

Mitrovic er einn efnilegasti framherji Evrópu og mjög eftirsóttur. Hann skoraði 20 deildarmörk fyrir Anderlecht á síðasta tímabili og hefur alls gert 44 mörk í 90 leikjum fyrir belgíska liðið.

Fyrr í vikunni keypti Newcastle Georgino Wijnaldum, besta leikmann hollensku úrvalsdeildarinnar á síðasta tímabili, og ljóst er að Skjórarnir ætla sér stóra hluti næsta vetur.

Steve McClaren tók við Newcastle í sumar af John Carver sem stýrði liðinu með litlum árangri seinni hluta síðasta tímabils.