Ferguson hringdi í forsætisráðherrann til að halda United í bikarnum

Tímabilið 1999-2000 í enska boltanum tóku ríkjandi Englands, bikar- og Evrópumeistarar Manchester United ekki þátt í ensku bikarkeppninni. Þeir fóru þess í stað til Brasilíu til að keppa í fyrstu útgáfunni af heimsmeistarakeppni félagsliða.

Nú er komið í ljós að United vildi ólmt taka þátt í bikarnum líka og reyndi Sir Alex Ferguson, knattspyrnustjóri liðsins á þeim tíma, að fá hjálp frá forsætisráðherranum þáverandi, Tony Blair.

Söguna segir maður að nafni Andy Walsh í nýjasta hefti Red News, tímarits Manchester United, en hann var á þessum tíma áhrifamaður í stuðningsmannafélagi Manchester United og í reglulegum samskiptum við Sir Alex.

United vildi taka þátt í bikarnum en stjórnarmenn félagsins voru undir mikilli pressu frá yfirvöldum að fara til Brasilíu. Það var talið hjálpa til við að England fengi að halda HM árið 2006.

„United litu út eins og vondu kallarnir í þessu,“ segir Walsh. „Sem stuðningsmenn vildum við auðvitað hafa liðið í bikarnum og eiga möguleika á að verja hann.“

Allt varð vitlaust þegar Kate Hoey, þáverandi íþróttamálaráðherra Breta, á að hafa sagt við Martin Edwards, þáverandi stjórnarformann United, á leiknum um góðgerðarskjöldinn: „Mér finnst þið vera að eyðileggja bikarinn.“

Þegar Ferguson heyrði af þessu brjálaðist hann, að sögn Walsh. „Ég talaði við hann í síma og hann sagði: „Nú er nóg komið. Þau eru að reyna að ýta okkur út. Þau mega eiga sig. Við förum til Brasilíu og ekki orð um það meir“.“

„Síðan sagði hann mér að hann reyndi að hringja í Tony Blair og fá hann til að bjarga þessu.“

Því miður fyrir Ferguson og Manchester United var Blair á leið til Júgóslavíu í viðræður við Slobodan Milosevic í von um að binda endi á stríðið í Kósóvó.

Allt fór á versta veg fyrir alla því boð Englands um að halda HM gekk ekki upp og United fór snemma heim frá Brasilíu með eitt jafntefli og tap. David Beckham var rekinn út af í jafntefli gegn mexíkóska liðinu Necaxa og Sir Alex var rekinn upp í stúku fyrir að mótmæla dómnum.

Manchester United sneri þó heim og vann ensku úrvalsdeildina með 18 stiga mun.

Árið 2006, árið sem England ætlaði að halda HM, fannst Slobodan Milosevic látinn í fangaklefa sínum í Hag þar sem hann varði sig fyrir mannréttindadómstólnum gegn ákæru um stríðsglæpi.