Tugþúsundir mótmæla í Madríd

Tugir þúsunda hafa komið saman í spænsku höfuðborginni Madríd til að mótmæla aðhaldsaðgerðum ríkisstjórnarinnar.

Vinstriflokkurinn Podemos stendur fyrir mótmælafundinum en liðsmenn hans vonast til að byggja á sigri vinstriflokksins Syriza í grísku þingkosningunum sem fram fóru fyrr í mánuðinum.

Podemos mælist nú í skoðanakönnunum stærsti flokkur Spánar og segist ætla vinna að því að semja um afskriftir hluta af skuldum Spánar vinni flokkurinn sigur í þingkosningum sem fram fara síðar á árinu.

Í frétt BBC segir að Podemos telji að stjórnmálamenn eigi að „þjóna fólkinu, ekki hagsmunum einkaaðila“.