Monk: Hann spilar ekki aftur fyrir Swansea City

Garry Monk, knattspyrnustjóri Gylfa Þórs Sigurðssonar hjá Swansea City hefur ákveðið það að spænski landsliðsmaðurinn Michu spili ekki fleiri leiki fyrir félagið.

Michu skoraði 22 mörk fyrir Swansea City tímabilið 2012-13 og sló í gegn en Spánverjinn glímdi við mikil meiðsli tímabilið á eftir. Michu var í láni hjá ítalska félaginu Napoli á síðustu leiktíð þar sem hann losnaði ekki við meiðsladrauginn og náði sér ekki á strik.

Michu á enn eitt ár eftir af samningi sínum við Swansea City en mun ekki spila fyrir Garry Monk.

„Hann verður ekki með liðinu á þessu tímabili," sagði Garry Monk í viðtali hjá South Wales Evening Post.  

„Ég ræddi við Michu á þessum tímapunkti í fyrra en þá vildi hann fara og taldi það vera það rétta í stöðunni fyrir sig. Ég studdi hann í því og núna hefur liðið tekið skref í aðra átt.  Það breyttist mikið hjá liðinu á síðasta tímabili," sagði Monk.

Gylfa Þór Sigurðsson fór á kostum með Swansea City á síðustu leiktíð en liðið náði þá áttunda sætinu í ensku úrvalsdeildinni sem er besti árangur velska liðsins frá upphafi.  Í sumar hefur Monk náð í Ganamanninn André Ayew frá Marseille og portúgalska landsliðsmanninn Eder frá Braga.

Garry Monk ætlar ekkert að gramsa sjálfur í málum Michu og lætur stjórnarformanninn  Huw Jenkins ákveða framtíð leikmannsins í samráði við umboðsmann hans. Spænsk lið hafa áhuga á Michu þar á meðal Granada og Rayo Vallecano.