16 FIFA-menn til viðbótar kærðir

Dómsmálaráðuneyti Bandaríkjanna hefur ákært sextán hátt setta embættismenn innan Alþjóðaknattspyrnusambandsins, FIFA, vegna spillingar. Þetta var tilkynnt í dag, fáeinum klukkustundum eftir að tveir varaforsetar FIFA voru handteknir í Zürich í morgun.

Meðal þeirra sem eru kærðir eru Ricardo Teixeira, fyrrum forseti brasilíska knattspyrnusambandsins, og Marco Polo del Negro, núverandi forseti þess sama sambands.

Sjá einnig: Bandaríkjamenn halda áfram að handtaka FIFA-menn

Meðal annarra sem eru ákærðir eru núverandi og fyrrverandi forsetar og stjórnarmenn í hinum ýmsu knattspyrnusamböndum í mið- og Suður-Ameríku sem og Alfredo Hawit, forseti Concacaf - knattspyrnusambands álfunnar. Einn þeirra á meira að segja sæti í svokallaðri „Fair Play“ nefnd hjá FIFA.

Alls hafa nú 41 einstaklingur verið ákærður fyrir þátt sinn í spillingu FIFA en rannsókn bandarískra og svissneskra yfirvalda á fjármálamisferli FIFA er einhver sú víðtækasta í sögunni.

„Sá trúnaðarbrestur sem hefur átt sér stað í þessu máli er engu líkur. Spillingunni virðast engin mörk sett,“ sagði Loretta Lynch, dómsmálaráðherra Bandaríkjanna.

„Og skilaboð okkar til þeirra sem leynast enn í skugganum og vonast eftir því að sleppa undan rannsókn okkar eru skýr. Þið munið ekki sleppa.“