Downing aftur heim til Middlesbrough

Stewart Downing er kominn aftur heim til Middlesbrough eftir sex ára útlegð.

Kantmaðurinn snjalli kemur frá West Ham United þar sem hann hefur leikið undanfarin tvö ár.

Downing kostaði Boro 5,5 milljónir punda en sú upphæð gæti hækkað um 1,5 milljón komist liðið upp úr B-deildinni og í úrvalsdeildina.

„Ég vildi alltaf snúa aftur. Ég var ekki með neina tímasetningu á því en núna er rétti tíminn,“ sagði Downing sem hefur leikið 35 landsleiki fyrir England.

„Það væri mitt mesta afrek á ferlinum ef ég gæti hjálpað Boro að komast aftur upp í úrvalsdeildina.“

Boro féll úr deild þeirra bestu 2009 en liðið tapaði fyrir Norwich City í umspili um sæti í úrvalsdeildinni í vor.

Downing skoraði sex mörk í 36 deildarleikjum með West Ham í vetur.