Sprengingar óvæntur fylgifiskur lögleiðingar marijúana

Slökkvilið, lögregla og lögfræðingar í Colorado-ríki í Bandaríkjunum kljást nú við óvæntan fylgifisk þeirrar ákvörðunar að lögleiða marijúana: sprengingar.

Á síðasta ári voru 32 sprengingar í heimahúsum og öðru húsnæði sem rekja mátti til „áhugaefnafræðinga“ sem höfðu breytt eldhúsi eða kjallara í rannsóknarstofur, ekki ólíkum þeim sem sjást í bandarísku þáttunum Breaking Bad.

„Þeir koma alltaf með einhverja aðra sögu: „Ekkert gerðist“, eða „Ég var að elda mat þegar hann sprakk skyndilega“,“ segir Chuck Mathis, slökkviliðsmaður í Grand Junction, í samtali við New York Times.

Sprengingarnar verða þegar folk reyna að ná olíu úr marijuana-plöntum með aðstoð eldfimra efna.

Enn sem komið er hefur enginn látist, en ekki liggur almennilega fyrir hvernig lagalega skuli takast á við vandamálið. Lögin heimila íbúum ríkisins að rækta, reykja, selja og meðhöndla marijúana.

Marijúana var lögleitt í Colorado árið 2012.