Vilja banna meðferðir sem lækna eiga samkynhneigð

Hvíta húsið styður hugmynd að banna meðferðir sem eiga að lækna fólk af samkynhneigð. Talsmaður Hvíta hússins segir meðferðir af þessu tagi geta valdið varanlegum skaða og engar vísindalegar rannsóknir styðji þær. Meðferðunum er oftast beitt á ungt fólk og dæmi eru um að þær valdi þunglyndi og kvíða.

Undirskriftalisti með 120,000 nöfnum um bann meðferða sem lækna eiga samkynhneigð var settur af stað eftir að unglingur í kynleiðréttingu, sem sendur var í slíka meðferð, svipti sig lífi.

Bann við slíkum meðferðum mun taka tíma þar sem þingið verður að samþykkja frumvarpið. Fylki innan Bandaríkjanna hafa verið hvött til þess að banna þær. Nú þegar hafa Kalifornía og New Jersey stigið skrefið og farið fram á bann.

Barack Obama, forseti Bandaríkjanna, hefur þegar tekið nokkur skref til að bæta réttindi samkynhneigðra. Hann hefur skrifað undir lög sem koma eiga í veg fyrir mismunun vegna kynhneigðar hjá ríkisstarfsmönnum.