Stoke lætur reynslubolta fara

Reynsluboltarnir Thomas Sörensen, Wilson Palacios og Andy Wilkinson fá ekki nýja samninga hjá enska úrvalsdeildarliðinu Stoke City. Núverandi samningar þeirra renna út 30. júní.

Þremenningarnir komu lítið við í sögu í vetur, líkt og á undanförnum árum.

Sörensen, sem er 38 ára, var sjö ár í herbúðum Stoke og lék alls 129 leiki með liðinu. Danski markvörðurinn missti sæti sitt til Asmir Begovic tímabilið 2010-11 og lék aðeins fjóra deildarleiki síðustu þrjú árin sín hjá Stoke.

Palacios, 30 ára, var keyptur frá Tottenham 2011 fyrir um sex milljónir punda. Hann náði sér ekki á strik á Brittania og lék aðeins 38 deildarleiki með Stoke á fjórum árum.

Wilkinson, 30 ára, er uppalinn hjá Stoke og lék sinn fyrsta leik með liðinu 2001. Hann var fastamaður í liðinu meðan Tony Pulis var við stjórnvölinn en spilaði lítið sem ekkert hjá Mark Hughes. Wilkinson var lánaður til Millwall í vetur og spilaði níu leiki með liðinu í B-deildinni.

Stoke endaði í 9. sæti ensku úrvalsdeildarinnar á nýafstöðnu tímabili.