Fótbolti

Abby ekki ánægð með að Klinsmann skuli nota "útlendinga" eins og Aron

Óskar Ófeigur Jónsson skrifar
Abby Wambach, Jürgen Klinsmann og Aron Jóhannsson.
Abby Wambach, Jürgen Klinsmann og Aron Jóhannsson. Vísir/Getty

Knattspyrnukonan Abby Wambach lagði skóna á hilluna í gær eftir magnaðan feril en í einu viðtalanna fyrir lokaleikinn þá hraunaði hún yfir karlalandsliðsþjálfarann Jürgen Klinsmann og „útlendingastefnu" hans.

Abby Wambach er ekki sátt við þá stefnu Klinsmann að finna leikmenn út um allan heim sem haga tengsl við Bandaríkin og geta þar með spilað með bandaríska landsliðinu.

Íslendingurinn Aron Jóhannsson er í þessum hópi en Aron spilaði meðal annars með bandaríska landsliðinu á HM í Brasilíu 2014. Aron er langt frá því að vera sá eini því stór hluti af bandaríska liðinu hefur samskonar tengsl við Bandaríkin.

„Ég myndi reka Jürgen [Klinsmann]. Ég tel að þessi tilraun með hann sem landsliðsþjálfara hafi ekki gengið upp," sagði Abby Wambach í viðtali við Bill Simmons og bætti við:

„Hann hefur ekki einbeitt nægilega vel að uppbyggingu yngri leikmanna. Þó að hann segi það þá hefur hann ekki gert það að mínu mati," sagði Wambach.

„Það að hann hafi komið inn með fullt af erlendum leikmönnum inn í liðið er eitthvað sem ég mun aldrei trúa á. Í mínu hjarta trúi ég ekki á slík vinnubrögð," sagði Abby.

Abby Wambach hélt áfram að hrauna yfir Jürgen Klinsmann.

„Það hlýtur líka að vera áhugavert fyrir leikmenn landsliðsins að sjá þjálfara sinn koma og fara af æfingum í þyrlu," sagði Wambach.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.