Ólafur Ingi og félagar misstu af sigrinum í lokin

Ólafur Ingi Skúlason og félagar í Genclerbirligi gerðu 1-1 jafntefli við Mersin Idmanyurdu í 11. umferð tyrknesku úrvalsdeildarinnar í fótbolta í kvöld.

Genclerbirligi-liðið var yfir í 65 mínútur í leiknum en fékk á sig jöfnunarmark tólf mínútum fyrir leikslok.

Rúmeninn Bogdan Stancu kom Genclerbirligi í 1-0 á 13. mínútu en Bólivíumaðurinn Ricardo Pedriel skoraði jöfnunarmarkið á 78. mínútu.

Ólafur Ingi Skúlason spilaði allar 90 mínútur leiksins á miðju Genclerbirligi. Ólafur Ingi hefur byrjað 9 af 11 leikjum liðsins á tímabilinu.

Genclerbirligi gerði þar með jafntefli í öðrum leiknum í röð en þeir voru tólf mínútum frá því að halda hreinu í þriðja leiknum í röð.

Genclerbirligi er 13. sæti með 12 stig og aðeins fimm stigum frá fallsæti. Mersin Idmanyurdu situr áfram í fallsæti þrátt fyrir að hafa náð í stig.