Einn sem stendur undir millinafni

Allflestir knattspyrnu-unnendur þekkja Wayne Rooney mætavel. Færri vita að hann heitir fullu nafni Wayne Mark Rooney og óhætt að fullyrða að hann standi svo sannarlega undir (milli)nafni.

Ferill Rooneys er glæsilegur eins og kemur fram hér á síðunni. Hann varð yngsti leikmaður og markaskorari bæði Everton, þar sem hann hóf ferilinn, og enska landsliðsins.

Hann varð svo dýrasti táningur sögunnar þegar Manchester United keypti hann á 25,6 milljónir punda. Mörgum þótti glapræði á sínum tíma að greiða svo mikið fyrir átján ára pilt en margsinnis hefur komið í ljós að United gerði kjarakaup.

Það væri of mikið verk að tíunda öll afrek Waynes Rooney í þessum fáu línum. Hann hefur notið mikillar velgengni, innan vallar sem utan, en einnig komið sér í klandur fyrir misgáfuleg uppátæki í einkalífi sínu. Þá setti hann allt á annan endann þegar hann fór fram á að verða seldur frá Manchester United árið 2010. Hann viðurkenndi síðar að það hafi verið stærstu mistök ferils síns.

Rooney fagnar þrítugsafmæli sínu í dag og stendur því á tímamótum í lífi sínu. Það má gera ráð fyrir að hann óski sér helst sigurs á grönnunum í Manchester City í borgarslag liðanna á morgun en í húfi er mögulega toppsæti ensku úrvalsdeildarinnar.

Snemma beygist krókurinn til þess sem verða vill og ef til vill viðeigandi að rifja upp sögu úr æsku Rooneys. Þegar hann var tíu ára fékk hann að vera lukkutröll Everton í borgarslag gegn Liverpool og ganga með sínum mönnum út á völl. Meðal fríðindanna sem fylgdu því hlutverki var að fá að skjóta á markvörð Everton í upphitun.

Hinn íturvaxni og skrautlegi Neville Southall var þá markvörður Everton. Rooney fór þó illa með gamla manninn og í stað þess að skjóta á hann vippaði sá stutti boltanum yfir ­Southall hvað eftir annað og í markið.

„Þetta fór í taugarnar á Big Nev,“ rifjaði Dave Watson, sem var fyrirliði Everton í leiknum, síðar upp í viðtali við enska miðla. „Neville var yfirleitt ekkert að skafa utan af hlutunum og lét strákinn hafa það óþvegið.“

Wayne Mark hefur síðan þá ekki hætt að hrella markverði og er ekki útlit fyrir að hann láti af þeirri iðju á næstu árum.

Ferill Wayne Rooney:

Árið 2002

17. ágúst

Spilaði sinn fyrsta leik með Everton.

2. október

Skoraði sitt fyrsta mark í 3-0 sigri á Wrexham í enska deildarbikarnum og varð yngsti markaskorari Everton frá upphafi.

19. október

Yngsti markaskorari ensku úrvalsdeildarinnar er hann tryggði Everton 2-1 sigur á Arsenal með draumamarki.

Árið 2003

12. febrúar

Frumraun með enska landsliðinu í vináttulandsleik gegn Ástralíu. Varð yngsti landsliðsmaður Englands.

6. september

Skoraði gegn Makedóníu og varð yngsti markaskorari Englands frá upphafi.

Árið 2004

Ágúst

Samdi við Manchester United sem greiddi metupphæð fyrir táning.

Árið 2008

21. maí

Vann Meistaradeild Evrópu með Manchester United eftir sigur á Chelsea, 6-5, í vítaspyrnukeppni.

Árið 2010

25. apríl

Valinn leikmaður ársins af leikmönnum. Skoraði 34 mörk það tímabilið.

Árið 2011

12. febrúar

Tryggði United sigur gegn City í Manchester-slagnum með hjólhestaspyrnu á 78. mínútu.

Árið 2014

Ágúst

Gerður að fyrirliða Manchester United eftir að hafa spilað í áratug með félaginu. Gerður að landsliðsfyrirliða í sama mánuði.

Árið 2015

8. september

Skoraði sitt 50. landsliðsmark og varð markahæsti leikmaður Englands frá upphafi.