Öryggismyndavél IKEA: Sjáðu geitina loga

Jólageitin sem kom komið var upp við verslun IKEA í Garðabæ fyrir tæpum tveimur vikum fuðraði upp á um fimm mínútum í hádeginu í dag. Nánast er um árlegan viðburð að ræða og hefur geitin í fæstum tilfellum fengið að prýða Kauptún lengur en í nokkrar vikur. Hún er hér í sinni sjöttu heimsókn, en alltaf orðið óveðri eða eldum að bráð.

Komið var upp afar strangri öryggisgæslu; myndavélakerfi og rafmagnsgirðingu þetta árið til að verja geitina frá óprúttnum aðilum. Það dugði þó ekki til því í þetta sinn kviknaði eldurinn út frá rafmagni.

Geitin á ættir sínar að rekja til Svíþjóðar og var nefnd í höfuðið á bænum Gävle, þar sem hún var fyrst reist á aðaltorgi bæjarins árið 1966. Örlög hennar þar í landi eru oftar en ekki þau sömu og á Íslandi en þar hefur hún verið eyðilögð allt að fjörutíu sinnum. Það er því engin nýlunda að geitin sé brennd með fólskulegum hætti.

Ikea-geitin íslenska er smíðuð hér á landi og er rúmir sex metrar á hæð og nokkur tonn að þyngd. Hún er fagurlega skreytt borðum og ljósum og lýsir þannig upp skammdregið í aðdraganda jólanna.

Þeir sem treysta sér til geta séð jólageitina í ljósum logum í meðfylgjandi myndskeiði. Það er tekið úr öryggismyndavél IKEA. Aðdáendur geitarinnar þurfa þó ekki að örvænta því unnið er að því að koma upp annarri geit. Vonir eru bundnar við að það verði fyrir helgi.