Þurftu að slökkva eldinn með annarri hendi

Upptök elds í Goðafossi í nóvember 2013 var afloftunarrör sem brotnaði frá tengingu þess við ketilinn. Áhöfn skipsins vann þrekvirki er hún náði að slökkva eldinn.

Þetta er meðal þess sem kemur fram í niðurstöðum Rannsóknarnefndar samgönguslysa en skýrsla vegna atburðarins var birt á vef nefndarinnar í kvöld.

Eldurinn kviknaði klukkan 03.40 þann 11. nóvember 2013 en þá var Goðafoss á siglingu frá Þórshöfn til Íslands. Eldurinn blossaði upp þegar skipið var statt níutíu sjómílur vestur af Þórshöfn. Aðstæður til slökkvistarfs voru afar erfiðar á tímabili var velta skipsins allt að 45 gráður. Um kl. 05:40 hafði skipverjum tekist að slökkva eldinn og eftir það var reynt að tryggja kælingu á skorsteini að utanverðu og reykræsta rýmið.

Báðar þyrlur Landhelgisgæslunnar, auk flugvélar og varðskipa, voru sendar af stað til skipsins en ekki reyndist þörf á aðstoð þeirra. Eldur blossaði upp aftur í skipinu er reynt var að sigla áfram til Íslands á nýjan leik. Er hann hafði verið slökktur var ákveðið að snúa skipinu aftur til Þórshafnar.

Fram kemur í skýrslunni að skipverjar hafi meira og minna þurft að slökkva eldinn með annarri hendi þar sem hin hafi verið notuð til að tryggja örugga festu. Mikinn reyk lagði einnig frá eldinum og þurftu þeir að skiptast á að fara inn í brúnna til að skola úr augum sér.

Tveir skipverjar slösuðust við slökkvistarfið. Annar þeirra þurfti að fara í aðgerð vegna slits á vöðvum sem hann hlaut í baráttunni við eldinn. Eftir atvikið hafa verið gerðar viðeigandi endurbætur á verklagsreglum í öryggishandbókum í öryggiskerfum (SMS) skipa útgerðarinnar til að koma í veg fyrir svona atvik og/eða hættuástand skapist auk viðbragða við þeim.