Moreno: Ótrúlegt hversu mikið Balotelli er gagnrýndur

Alberto Moreno, spænski vinstri bakvörður Liverpool, telur að Mario Balotelli, fái ósanngjarnan skerf af gagnrýni en Balotelli var töluvert gagnrýndur fyrir frammistöðu sína með Liverpool á síðasta tímabili.

Það voru töluverðar væntingar gerðar til  Balotelli þegar Liverpool greiddi fyrir hann sextán milljónir punda síðasta sumar og honum tókst ekki að skora á fyrstu mánuðunum.

Jókst pressan á honum töluvert þegar framherjinn Daniel Sturridge meiddist en honum tókst aldrei að ná takti í rauðu treyjunni.

Fékk Balotelli skýr skilaboð þegar hann var ekki meðal leikmannana sem fóru í æfingarferð liðsins til Finnlands, Ástralíu og Asíu en hann hefur verið orðaður við ýmis lið á Ítalíu undanfarna mánuði.

„Það er ósanngjarnt hversu mikið hann er gagnrýndur. Hann er afslappaður strákur sem fer ekki í taugarnar á neinum hjá félaginu. Hann hefur alla burði til þess að verða frábær framherji þrátt fyrir að hlutirnir hafi ekki dottið fyrir hann á síðasta tímabili. Ef hann fer á endanum mun ég óska honum alls hins besta þar sem hann er frábær strákur.“