Rafael í viðræðum við Galatasaray

Brasilíski hægri bakvörðurinn Rafael da Silva, sem leikur með Manchester United á Englandi, er hugsanlega á leið til tyrkneska liðsins Galatasaray.

Manchester United mun fljótlega tilkynna kaup liðsins á ítalska hægri bakverðinum Matteo Darmian sem þýðir væntanlega að Rafael mun ekki verða hægri bakvörður númer eitt hjá Louis van Gaal, knattspyrnustjóra Manchester United.

Rafael er 25 ára gamall en hefur verið óheppinn með meiðsli frá því hann kom til Manchester United árið 2008, aðeins 18 ára gamall, frá Fluminense.

Tyrknesk lið hafa mikið verið að berja víurnar í leikmenn Manchester United að undanförnu. Nani gekk í raðir Fenerbahce fyrir skemmstu og þá hefur Robin van Persie verið orðaður við Fenerbahce síðustu daga.