Telja sig hafa náð að stöðva útbreiðslu MERS

Heilbrigðisyfirvöld telja að útbreiðsla MERS-veirunnar í Suður-Kóreu hafi verið stöðvuð. Engin ný tilfelli hafa komið upp í sjö daga, en enn er þó talin þörf á að halda tæplega fimm hundruð manns í einangrun vegna gruns um smit.

MERS-veiran hefur haft mikil áhrif á þúsundir einstaklinga, en yfir 2.900 skólum hefur þurft að loka og nokkrum sjúkrahúsum. Alls hafa 36 látist af völdum veirunnar af þeim 186 sem með hana hafa greinst síðan hún gerði fyrst vart við sig í maí.

Veiran getur valdið bráðri lungnabólgu með hita, öndunarerfiðleikum og nýrnabilun, en er ekki sögð bráðsmitandi. Varað hefur verið við ferðalögum til landsins.