Begovic kominn til Chelsea

Chelsea staðfesti í morgun að félagið hafi keypt bosníska markvörðinn Asmir Begovic frá Stoke City fyrir átta milljónir punda.

Begovic er ætlað að fylla í skarð Petr Cech sem gekk í raðir Arsenal á dögunum. Líklegt er að hann verði því fyrst og fremst varamaður fyrir Thibaut Courtois.

Begovic kom til Stoke árið 2010 og vakti athygli margra stórliða með frammistöðu sinni en hann hefur lengi verið orðaður við Chelsea. Hann átti eftir eitt ár af samningi sínum við Stoke.

„Ég tel að þetta sé rétti staðurinn fyrir mig að halda áfram að vaxa sem leikmaður. Ég ræddi vel og lengi við knattspyrnustjórann [Jose Mourinho] um það,“ sagði Begovic. „Ég tel að ég verði mikilvægur hluti af þessu liði.“