Selfoss verður af milljónum þar sem Jón Daði fer frítt

Jón Daði Böðvarsson, leikmaður Viking í norsku úrvalsdeildinni í fótbolta, fer frítt til þýska B-deildarliðsins Kaiserslautern í janúar eins og Vísir greindi frá fyrr í dag.

Kaiserslautern var tilbúið að greiða 58 milljónir fyrir Jón Daða en Viking vildi ekki selja leikmanninn fyrir svo lága upphæð.

Það kaus heldur að halda honum út tímabilið og nýta hann í toppbaráttu norsku úrvalsdeildarinnar sem og í bikarnum þar sem Víkingarnir eru komnir í átta liða úrslitin.

Þessi ákvörðun kemur illa við Selfoss, uppeldisfélag Jóns Daða, sem seldi hann til Viking eftir að hann sló í gegn í Pepsi-deildinni 2012 þegar hann var kjörinn efnilegasti leikmaður deildarinnar.

Óskar Sigurðsson, formaður knattspyrnudeildar Selfoss, staðfestir við Vísi að Selfoss átti að fá hlut af næstu sölu Jóns Daða þegar hann færi frá Viking.

„Þetta var um 15-20 prósent minnir mig,“ segir Óskar. „Svona er þetta bara. Tilboðið var of lágt.“

Tuttugu prósent af 58 milljónum eru 11,6 milljónir sem hefðu nýst Selfyssingum vel í baráttunni í 1. deildinni þar sem liðið hefur verið síðan það féll fyrir þremur árum.

„Hann er með aðra klásúlu sem skilar okkur tekjum í formi árangurstengdra greiðslna. Við fáum því eitthvað smotterí á móti,“ segir Óskar Sigurðsson.

Jón Daði er búinn að spila 15 leiki fyrir Viking í norsku úrvalsdeildinni á tímabilinu og skora sex mörk. Hann skoraði tvö mörk í síðasta leik gegn Álasund sem liðið vann, 4-1. Víkingarnir eru í fjórða sæti deildarinnar.