Bað fórnarlömb sín afsökunar

Dzhokhar Tsarnaev bað fórnarlömb sín afsökunar í fyrsta sinn, skömmu áður en hann var formlega dæmdur til dauða í dag. Tsarnaev og bróðir hans myrtu fjóra einstaklinga og særðu 264 þegar þeir sprengdu sprengjur við endamark maraþonsins í Boston árið 2013. Bróðir hans var skotinn til bana af lögreglumönnum en einn lögreglumaður lést í skotbardaganum.

Þetta var fyrsta yfirlýsing Tsarnaev, sem er 21 árs gamall, frá því að réttarhöldin yfir honum hófust. Hann sagðist hafa hlustað á vitnisburði eftirlifenda og sagði þau hafa sýnt styrk og þolinmæði. Tsarnaev þakkaði Allah og lögmanni sínum.

Hann var í raun dæmdur til dauða í síðasta mánuði þegar kviðdómurinn las upp niðurstöðu sína, en það var formlega gert í dag af dómara.

Dómarinn sagði að það illa sem menn geri lifi eftir að þeir séu látnir en góðverk þeirra séu oft grafin með beinum þeirra. Hann sagði að enginn myndi muna eftir því að kennurum Tsarnaev hefði líkað við hann, að vinum hans hefði þótt hann skemmtilegur og að hann hafi sýnt gæsku.

„Það sem fólk mun muna er að þú myrtir og limlestir saklaust fólk og að þú gerðir það vísvitandi,“ hefur AP fréttaveitan eftir dómaranum George O´Toole.

Fórnarlömb þeirra bræðra eru þó ekki sammála um einlægni afsökunarbeiðni Tsarnaev. Ein kona sem BBC ræddi við sagði það vera augljóst að hann hafi ekki verið að meina það sem hann sagði og að hann hafi ekki sýnt vott af iðrun. Annar sagði afsökunarbeiðnina vera nóg fyrir sig. Hann vonaðist til að afsökunarbeiðnin hafi verið einlæg en sagðist ekki geta sagt til um það.