Mummi minnir á að dómurinn tók ekki afstöðu til meintra hótana

Guðmundur Týr Þórarinsson, alla jafna þekktur sem Mummi í Götusmiðjunni, segir það varhugavert ef opinberir starfsmenn sem eru í forsvari viðkvæmra málaflokka, geti tjáð sig með ærumeiðandi hætti gagnvart almennum borgurum og sakað þá um refsiverða háttsemi  í skjóli tjáningarfrelsis og almennrar þjóðfélagsumræðu.

Þetta kemur fram í tilkynningu frá Mumma sem hann sendir á fjölmiðla í tengslum við umfjöllun þeirra um meiðyrðamál hans gegn Braga Guðbrandssyni, forstjóra Barnaverndarstofu en Bragi var sýknaður á dögunum.

Málið laut að ómerkingu átta ummæla sem Bragi lét falla í fjölmiðlum í kjölfar lokunar meðferðarheimilisins Götusmiðjunnar árið 2010.

Þar sagði Bragi meðal annars að undirrót lokunar Götusmiðjunnar væri stjórnunarvandi forstöðumannsins Mumma sem væri farinn að bitna á meðferðinni og skaða börnin sem væru í meðferð. 

Þá hafi samskipti Mumma við börnin farið yfir velsæmismörk og framganga hans valdið vanlíðan og óöryggi, auk þess hafi hann lagt starsmenn í einelti og ekki síst hótað ungmennum líkamsmeiðingum.

Mummi vill sérstaklega taka fram að dómsmeðferðin í meiðyrðamáli hans hafi ekki lotið að því að ná fram sönnun um hvort hann hafi hótað börnunum líkamsmeiðingum, eins og hann segir fjölmiðlaumfjöllun hafa bent til. Málið hafi einungis snúið að því hvort ummæli Braga Guðbrandssonar hafi verið ærumeiðandi gagnvart honum

„Dómurinn fjallaði þar að leiðandi ekki efnislega um hvort ég hefði gerst sekur um að hafa hótað börnunum, heldur eingöngu hvort ummæli Braga hefðu skaðað æru mína. Barnaverndaryfirvöld sendu málið aldrei til lögreglu til frekari rannsóknar, þrátt fyrir óskir mínar þess efnis,” segir Mummi og bætir við:

„Hefur því engin niðurstaða fengist varðandi meintar ávirðingar í minn garð. Þrátt fyrir að engin opinber rannsókn hafi farið fram lét Bragi ummælin falla. Þrátt fyrir það taldi dómurinn að tjáning Braga hefði verið innan tjáningarfrelsis hans.

Að sögn Mumma verður niðurstöðu hérðasdóms áfrýjað til Hæstaréttar.