Bragi sýknaður í meiðyrðamáli Mumma í Götusmiðjunni

Bragi Guðbrandsson, forstjóri Barnaverndarstofu, var í dag sýknaður í Héraðsdómi  í meiðyrðamáli sem Guðmundur Týr Þórarinsson, betur þekktur sem Mummi í Götusmiðjunni, höfðaði á hendur honum.

Málið laut að ómerkingu átta ummæla sem Bragi lét falla í fjölmiðlum í kjölfar lokunar meðferðarheimilisins Götusmiðjunnar árið 2010.

Þar sagði Bragi meðal annars að undirrót lokunar Götusmiðjunnar væri stjórnunarvandi forstöðumannsins Mumma sem væri farinn að bitna á meðferðinni og skaða börnin sem væru í meðferð.

Þá hafi samskipti Mumma við börnin farið yfir velsæmismörk og framganga hans valdið vanlíðan og óöryggi, auk þess hafi hann lagt starsmenn í einelti og ekki síst hótað ungmennum líkamsmeiðingum.

Bragi áður dæmdur fyrir sömu ummæli

Bragi var dæmdur síðastliðið sumar fyrir meiðyrði í garð Guðmundar og fyrrgreind ummæli dæmd dauð og ómerk því ásamt því að Braga var gert að greiða Mumma alls um 650 þúsund krónur í miskabætur og málskostnað.

Bragi mætti ekki við réttarhöldin en hann sagðist aldrei hafa fengið stefnuna afhenta. Hún hafi verið afhent starfsmanni Barnaverndarstofu á meðan Bragi var í sumarleyfi í Perú. Stefnan var afhent á Barnaverndarstofu 19. júní 2014 og málið dómtekið sex dögum síðar.

Bragi segist hafa fengið að vita af málinu nokkrum vikum síðar eftir að hann kom heim úr sumarleyfi. Þá hafi hann látið starfsmann Barnaverndarstofu kanna málið og upp úr krafsinu kom að dómur hafði fallið og hann síðan birtur á haustmánuðum.

Í niðurstöðu Héraðsdóms Reykjavíkur frá því í fyrra sagði að bera skuli stefnanda í hag þar sem stefndi hafi hvorki sótt né látið sækja þing. Af þeim sökum taldi Bragi dóminn ekki efnislegan og fór því fram á endurupptöku sem Héraðsdómur Reykjavíkur varð við í upphafi þessa árs. 

Vísir fjallaði ítarlega um aðalmeðferðina í hinu endurupptekna meiðyrðamáli fyrr í sumar og nú liggja niðurstöður héraðsdóms fyrir. Niðurstaða dómsins er að ummæli Braga brytu ekki í bága við tjáningarfrelsi samkvæmt stjórnarskrá og þau hafi ekki falið í sér óviðurkvæmileg ummæli sem skaðað hafi Guðmund Tý.

Bragi var sýknaður af öllum kröfum Guðmundar, Mumma gert að greiða Braga 600 þúsund krónur í málskostnað og þá var ákveðið að gjafsóknarkostnaður Mumma skyldi greiðast úr ríkissjóði, þar með talin málflutningsþóknun lögmanns hans, 600.000 krónur að meðtöldum virðisaukaskatti.

Mummi hyggst vísa málinu til Hæstaréttar.