Tottenham strax byrjað á leikmannamarkaðinum

Enska úrvalsdeildarliðið Tottenham Hotspur hefur fest kaup á austurríska varnarmanninum Kevin Wimmer frá Köln.

Wimmer skrifaði undir fimm ára samning við Tottenham en talið er að kaupverðið sé í kringum fjórar milljónir punda.

Wimmer er fyrsti leikmaðurinn sem Tottenham kaupir í sumar en liðið lenti í 5. sæti úrvalsdeildarinnar á nýafstöðnu tímabili.

Wimmer, sem er 22 ára, gekk til liðs við Köln frá LASK Linz 2012 og spilaði 72 leiki fyrir þýska liðið. Hann hefur leikið einn landsleik fyrir Austurríki.