Fá ekki greidd laun: „Forsetinn með leikþátt í marga mánuði“

Arnór Smárason, landsliðsmaður Íslands í knattspyrnu og leikmaður Torpedo Moskvu, segir langan aðdraganda vera að því að leikmenn liðsins ákváðu að taka ekki þátt í fyrirhugaðri æfingu liðsins í dag. Leikmenn liðsins hafa ekki fengið greidd laun í fjóra mánuði og eftir leikþátt forsetans undanfarnar vikur var mælirinn fullur.

Arnór segir í samtali við Vísi að leikmenn hafi mætt á æfingasvæðið í dag. Þeir hafi hins vegar neitað að æfa. Forseti félagsins hafi komið og haldið yfir þeim tölu.

„Forsetinn er búinn að vera með leikþátt í marga mánuði. Menn eru bara orðnir þreyttir á því, þessum endalausu afsökunum,“ segir Arnór annars léttur við blaðamann. Hann var úti að borða með nokkrum enskumælandi félögum sínum í liðinu að gera upp atburði dagsins þegar hann svaraði í símann.

Fengið smápeninga til að lifa af

Skagamaðurinn er á lánssamningi hjá Torpedo liðinu frá Helsingborg í Svíþjóð. Þangað kom hann um mánaðarmótin febrúar mars. Ljóst var að Arnór væri ekki í náðinni hjá Henrik Larsson, þjálfara sænska liðsins, sem sagði að Arnór þyrfti að finna sér nýtt félag.

„Enginn hefur fengið greidd launin sín síðan ég kom hingað,“ segir Arnór. Hann hafi bara fengið einhverja smápeninga til að lifa af. Forsetinn hafi endurtekið lofað því að greiðslur væru handan við hornið. Síðast hafi hann sagt að nýir styrktaraðilar væru komnir um borð en enn ætti eftir að berast fjármagn frá þeim. Um orkufyrirtæki væri að ræða.

Arnór segir það hafa verið mjög skrýtna tilfinningu að mæta á æfingasvæðið í dag og spila ekki fótbolta. Hann elski fótbolta og skrýtið að fara í verkfall.

„En liðið tekur þessa ákvörðun og maður er auðvitað partur af hópnum. Við stöndum saman í þessu.“

Áfram verkfall á morgun

Leikmenn liðsins ætla heldur ekki að mæta á æfingu á morgun og vona að sú ákvörðun ýti við forráðamönnum félagsins. Mikið er undir hjá liðinu sem situr í botnsæti deildarinnar, þremur stigum frá öruggu sæti þegar tvær umferðir eru eftir. Liðið á næst leik á laugardaginn og eðli málsins samkvæmt er um lykilleik að ræða.

Að öðru leyti lætur Arnór vel af veru sinni í Rússlandi. Moskva sé frábær borg og hann hafi það mjög gott. Markmiðið hafi verið að spila í sterkri deild og skora nokkur mörk. Það hafi gengið eftir, hann sé fullur sjálfstrausts og í toppformi. Nú voni hann bara að tíminn í Rússlandi endi á góðum nótum.

Arnór, sem er uppalinn Skagamaður og hefur spilað í Hollandi, Svíþjóð og Danmörku auk Rússlands og Íslands, á að snúa aftur til æfinga hjá Helsingborg 1. júlí að loknu sumarfríi. Ljóst sé hins vegar að því sem næst 100% lýkur eru á því að hann finni sér annað félag. Frammistaða hans í Rússlandi hafi hjálpað, hann finni fyrir áhuga félaga og hlakki til framhaldsins.