Pólverjar reisa turna við landamærin að Kaliningrad

Stjórnvöld í Póllandi hafa ákveðið að ráðast í gerð eftirlitsturna meðfram landamærunum að rússneska landsvæðinu Kaliningrad.

Til stendur að reisa sex 50 metra háa turna sem munu streyma myndum til landamæravarða sem vakta 200 kílómetra löng landamæri Póllands og Kaliningrad.

Áætlaður kostnaður við gerð turnanna er um hálfur milljarður króna sem verður greiddur að stærstum hluta úr sjóðum Evrópusambandsins.

Í frétt BBC segir að ákvörðun um byggingu turnanna hafi verið tekin í kjölfar fregna um að Rússar hafi komið eldflaugum fyrir í Kaliningrad, en mikil spenna hefur verið í samskiptum Rússlands og Vesturlanda síðustu misserin.