Sigríður Ingibjörg íhugar að hætta

Sigríður Ingibjörg Ingadóttir segist vera að íhuga stöðu sína og útilokar ekki að hún hætti í stjórnmálum í kjölfar harðrar gagnrýni á formannsframboð hennar á landsfundi flokksins.

Margir hafa farið hörðum orðum um framboð Sigríðar Ingibjargar sem ákvað með sólarhringsfyrirvara að bjóða sig fram og hafði svo mikinn stuðning að einungis eitt atkvæði skildi að hana og formanninn.

Þung orð hafa fallið í garð Sigríðar Ingibjargar og nú síðast sagði Ingibjörg Sólrún Gísladóttir á Facebook að framboð hennar hafi verið misráðið og hefði aldrei getað farið öðruvísi en illa.

Sigríður Ingibjörg segist í viðtali við hádegisfréttir Bylgjunnar ætla að láta málið setjast næstu daga en hugsa sinn gang, enda hafi verið erfitt að sitja undir svo þungum ásökunum.