Skaut nakinn svartan mann til bana

Lögregluþjónn í Atlanta í Bandaríkjunum skaut í gær nakinn mann til bana. Maðurinn var óvopnaður og hafði reynt að komast inn í íbúðir. Lögreglan fékk símtöl þar sem íbúar sögðu að maðurinn hagaði sér eins og hann væri óður og að hann væri skríðandi á jörðinni.

Lögreglan segir að þegar lögregluþjónninn kom á vettvang hafi maðurinn hlaupið í áttina að honum. Hann sinnti ekki boðum lögregluþjónsins um að stoppa. Lögregluþjónninn dró þá upp byssu og skaut manninn tvisvar sinnum.

Á vef CNN segir að þar sem maðurinn hafi verið óvopnaður hafi rannsókn málsins verið færð í hendur sjálfstæðs aðila.

Nakti maðurinn var svartur en lögregluþjónninn hvítur. Mikil reiði er í Bandaríkjunum vegna fjölda atvika þar sem hvítir lögreglumenn skjóta svarta menn, sem jafnvel hafa verið óvopnaðir.