Nígeríska konan tengdist ekki hryðjuverkasamtökum

Lögregla í Nígeríu hefur staðfest að konan sem var barin til dauða af æstum múg á markaði í Bauchi um síðustu helgina hafi átt við geðræn vandamál að stríða og ekki tengst hryðjuverkasamtökum á nokkurn hátt.

Ráðist var á hina 33 ára Thabita Haruna eftir að gestir markaðar í Bauchi grunuðu hana um að vera sjálfsvígssprengjumann og hún neitaði að láta leita á sér.

Lögregla er enn með málið til rannsóknar og enn hefur enginn verið handtekinn vegna málsins.

Hryðjuverkasamtökin Boko Haram hafa gert fjölmargar árásir í norðurhluta Nígeríu og hafa margoft fengið konur til að framkvæma sjálfsvígssprengjuárásir á fjölförnum stöðum í landinu.

Liðsmenn samtakanna vilja koma á íslömsku ríki á svæðinu og hefur nígerískum stjórnvöldum reynst erfitt að stöðva framgang samtakanna síðustu ár.