Harmleikur í Toronto: Þriggja ára drengur varð úti

Þriggja ára gamall kanadískur drengur lét lífið í gærmorgun eftir að hafa farið af heimili ömmu sinnar um miðja nótt. Drengurinn hélt um klukkan fjögur að staðartíma út ískalda nóttina á meðan fjölskylda hans svaf fasta svefni. Sá stutti var aðeins klæddur í bleyju og bol auk stígvéla. Kanadískir miðlar greina frá.

Drengurinn, Elijah Marsh, fór að sofa um hálf tíuleytið á föstudagskvöldið en fjölskylda hans varð ekki vör við að hann var ekki í rúmi sínu fyrr en hún vaknaði um hálf átta á laugardagsmorgun. Við tók leit lögreglu og sjálfboðaliða og fannst drengurinn liggjandi utan við hús í hverfinu klukkan 10:20 sama morgun. Tæpum fjórum tímum síðar var hann úrskurðaður látinn.

Afar kalt er í Toronto en um fjögurleytið, þegar drengurinn yfirgaf heimili sitt, var 19 gráðu frost. Ef tekið er mið af vindi var eins og um 28 stiga frost væri að ræða.

Íbúar Toronto og Kanada syrgja drenginn og ræddi borgarstjórinn John Tory við fjölmiðla í morgun vegna málsins.

„Þetta er mikill harmleikur,“ sagði borgarstjórinn. „Ég sendi samúðarkveðjur frá dýpstu hjartarótum til fjölskyldunnar. Hugur og bænir íbúa Toronto eru hjá ykkur á þessum tímum,“ bætti hann við á Twitter síðar um daginn.

Lögreglustjórinn Bill Blair sagðist telja að allir íbúar Toronto væru særðir vegna atburðarins.

„Ég held að þetta minni okkur á að fara heim og faðma börnin okkar enn þéttar.“

Uppfært klukkan 01:38

Í fyrri útgáfu fréttarinnar stóð að drengurinn hefði verið á heimili sínu. Hið rétta er að hann var í pössun hjá ömmur sinni eins og var oft tilfellið þegar móðir hans þurfti að vinna.