Innlent

Kvika frá Krýsuvík gæti gosið upp í Reykjavík

Kristján Már Unnarsson skrifar
Eldgos gæti komið upp í jaðri Reykjavíkur, í sprungukerfi frá Krýsuvíkureldstöðinni. Þetta er mat Haraldar Sigurðssonar eldfjallafræðings, sem hvetur til þess að betra áhættumat verði gert fyrir Reykjavíkursvæðið.

Í þættinum „Um land allt” á Stöð 2 í gærkvöldi var Haraldur spurður hver væri hættulegasta eldstöð Íslands.

„Það er enginn vafi að það er eldstöðin sem er ekki byrjuð, - er ekki búin að fæðast. Það er einkenni á Íslandi, á mörgum gosum, að þau brjótast út á nýjum stað,” svaraði Haraldur.

Í þættinum nefndi Haraldur nokkur nýleg dæmi um þetta; Heimaeyjargosið, Fimmvörðuháls og Skaftárelda. Jafnframt má benda á Holuhraunsgosið sem kom upp 40 kílómetrum frá Bárðarbungu. Haraldur rifjar upp þann óróa sem verið hefur á Krýsuvíkursvæðinu á undanförnum árum.

„Krýsuvíkursvæðið er stór eldstöð. Sú eldstöð hefur sprungukerfi. Það sprungukerfi liggur rétt fyrir utan Reykjavík, - uppi í Heiðmörk.”

Menn hafa löngum talið Reykjavíkursvæðið utan gosbeltisins en Haraldur telur að þar verði menn líka að gera ráð fyrir mögulegum eldsumbrotum, sem geti komið upp á yfirborðið í Heiðmörk. Því þurfi að fylgjast betur með Reykjavíkursvæðinu að þessu leyti og gera miklu betra áhættumat.

Sprungusveimurinn frá Krýsuvíkursvæðinu teygir sig raunar inn í byggðina í Reykjavík. Þannig liggur ein sprungan í gegnum Norðlingaholtshverfið og með austurjaðri Rauðavatns. Þá má rifja upp að hnika þurfti til Árbæjarlaug í skipulagi á sínum tíma þegar í ljós kom sprunga sem liggur í gegnum Árbæjarhverfið.

„Þær tengjast því, sennilega,” svaraði Haraldur spurður um hvort þessar sprungur tengdust Krýsuvíkurkerfinu.

-Þannig að við gætum fengið eldstöð uppi í Árbæ?

“Það er ekki óhugsanlegt,” svaraði eldfjallafræðingurinn. 

Á sjónvarpsvef Vísis má sjá þættina „Um land allt".

Bárðarbunga

Tengdar fréttir

Almannavörnum tilkynnt um landris í Krýsuvík

Landris mælist nú við Kleifarvatn og er talið að kvika geti verið að byggja upp þrýsting á litlu dýpi í eldstöðvakerfi Krýsuvíkur. Jarðvísindamenn hafa upplýst Almannavarnir og lögregluyfirvöld um stöðuna og mælt með því að sérstök aðgæsla verði höfð með svæðinu vegna hættu á lífshættulegum gufusprengingum.

Sprungur á Norðlingaholti

Ein af stóru jarðskjálftasprungunum, sem ganga í gegnum Rauðavatn og Norðlingaholt, er nú vel sýnileg. Hún er það breið að nær væri að kalla gjá. Lægðin í landslaginu upp af Rauðavatni norðaustanverðu er í raun ein sprungan. Hún liggur síðan undir Suðurlandsveginn og áfram í gegnum nýbyggingasvæðið á Norðlingaholti.

Gagnrýnir Almannavarnir fyrir andvaraleysi

Almannavarnir huga ekki að hættunni sem steðjar að höfuðborgarsvæðinu þegar eldsumbrot verða næst á Reykjanessvæðinu og yfirvöld hafa leyft byggingar á stöðum sem ekki ætti að byggja á. Þetta segir Haraldur Sigurðsson, einn helsti eldfjallasérfræðingur heims

Grannt fylgst með landrisi við Krýsuvík

Jarðvísindamenn fylgjast nú grannt með skjálftahrinum og landrisi við Krýsuvík og hafa upplýst almannavarnir um þróun mála. Aukinn þrýsingur í jarðskorpunni þar undir er talinn geta stafað annaðhvort af kvikuinnstreymi eða breytingum í jarðhitakerfum.

Telur umbrot í Krýsuvík geta leitt til sprungugoss í Heiðmörk

Haraldur Sigurðsson, einn þekktasti og virtasti eldfjallafræðingur Íslendinga, telur að umbrotin í Krýsuvík geti hugsanlega leitt til eldgoss fyrir ofan Hafnarfjörð, í Heiðmörk eða í grennd við Elliðavatn. Í grein á bloggsíðu sinni fjallar Haraldur um hræringarnar sem hófust með landrisi á Krýsuvíkursvæðinu fyrir þremur árum en þær voru þess eðlis að jarðvísindamenn töldu ástæðu til að upplýsa almannavarnir og lögregluyfirvöld um stöðuna.

Mest lesið


Fleiri fréttir

Sjá meira


×

Mest lesið