Martínez: Viljum fá 2-3 nýja leikmenn

Roberto Martínez, knattspyrnustjóri Everton, vill fá 2-3 nýja leikmenn til liðsins áður en félagaskiptaglugginn lokar.

Argentínumaðurinn Ramiro Funes Mori horfði á Everton tapa 0-2 fyrir Manchester City í gær og segir Martínez að félagið sé nálægt því að ganga frá kaupunum á honum. Spánverjinn vill þó fá fleiri leikmenn.

„Við erum búnir að ná samkomulagi við River Plate. Þetta er leikmaður sem vann Copa Libertadores í sumar. Hann er 24 ára, örvfættur miðvörður með hugarfar sigurvegarans og mun passa vel inn í okkar hóp,“ sagði Martínez um Mori sem hefur leikið einn landsleik fyrir Argentínu.

„Við ætlum að bæta í hópinn og það er mikilvægt að við fáum 2-3 leikmenn. Við erum með sterkan hóp en þurfum enn að styrkja okkur í nokkrum stöðum,“ sagði Martínez.

Everton hefur m.a. verið orðað við Úkraínumanninn Andriy Yarmolenko sem leikur með Dynamo Kiev og brasilíska kantmanninn Bernand, leikmann Shakhtar Donetsk. Þá hefur Martínez áhuga á að fá Adnan Januzaj á láni frá Manchester United.