Ölgerðin í hart við ríkið: Krefst endurgreiðslu á tolli af kartöfluflögum

Ölgerðin Egill Skallagrímsson hefur krafið fjármála- og efnahagsráðuneytið um endurgreiðslu á tolli af innfluttu snakki. Um er að ræða kartöflusnakk sem ber 59 prósenta toll við innflutning til landsins en Hjördís Birna Hjartardóttir, lögmaður Ölgerðarinnar, segir þennan toll ómálefnalegan og að hann standist ekki.

„Við erum að halda fram að þetta sé ofurtollur,“ segir Hjördís Birna en á vefsíðu Ölgerðarinnar kemur fram að hún flytur inn til landsins kartöfluflögur frá Lay´s sem er í eigu bandaríska fyrirtækisins Pepsico. Það fyrirtæki á einnig Dorritos sem framleiðir maískornflögur sem Ölgerðin flytur inn en til samanburðar við 59 prósenta toll sem Ölgerðin þarf að greiða af innflutningi á kartöfluflögum til landsins þarf að greiða 20 prósenta toll af maískornflögum.

„Við viljum meina að verið sé að vernda tiltekna aðila hér innanlands þegar kemur að kartöflusnakkinu,“ segir Hjördís Birna og nefnir sem dæmi Iðnmark og Þykkvabæjar sem framleiða sambærilegar kartöfluflögur. Iðnmark framleiðir Stjörnusnakk en Þykkvabæjar framleiðir Nasl.

„Þetta er bara verndartollur. Það er bara verið að passa að þeir fái frið til að selja sitt,“ segir Hjördís Birna.

Málið verður tekið fyrir í Héraðsdómi Reykjavíkur á morgun.