Chelsea fær varnarmann frá Reading

Chelsea hefur gengið frá kaupum á Michael Hector, varnarmanni Reading, en hann er landsliðsmaður Jamaíka.

Hector er uppalinn hjá Millwall, en hefur verið á mála hjá Reading frá árinu 2009. Þar hefur hann verið á láni hjá tíu liðum, nú síðast Aberdeen tímabilið 2013-2014.

Sjá einnig: Í beinni: Lokadagur félagaskipta á Englandi | Glugginn lokar kl. 17.00

Hector mun spila áfram hjá Reading út þetta tímabil og mun svo ganga í raðir ensku meistaranna fyrir næstu leiktíð.

Kappinn skrifar undir fimm ára samning við enska stórliðið, en þetta er ansi mikið stökk fyrir hann. Hann spilaði meðal annars með liðum á borð við  Havant & Waterlooville og Didcot Town fyrir fimm árum síðan.