Jóhann Berg lagði upp tvö í langþráðum sigri

Jóhann Berg Guðmundsson lagði upp tvö mörk í 3-1 sigri Charlton á Sheffield Wednesday í dag en þetta var fyrsti sigur Charlton frá 22. ágúst.

Jóhann byrjaði leikinn að vanda og lagði upp fyrstu tvö mörk leiksins fyrir Johnnie Jackson og Simon Makienok. Charlton bætti við marki í seinni hálfleik og kom því ekki að sök þegar gestirnir minnkuðu muninn á 73. mínútu leiksins.

Charlton er áfram í fallsæti en nú aðeins einu stigi á eftir Milton Keynes Dons í 21. sæti að 16. umferðum loknum.

Þá lék landsliðsfyrirliðinn Aron Einar Gunnarsson allar 90 mínútur leiksins í 2-0 sigri Cardiff á Reading á heimavelli en með sigrinum skaust Cardiff upp í 7. sæti deildarinnar.