Starfskraftar streyma frá Austur-Evrópu

Frá því að Rúmenía fékk aðild að Evrópusambandinu árið 2007 hafa fimm þúsund læknar flutt þaðan. Flestir þeirra eru innan við fertugt. Alvarlegur læknaskortur er því farinn að gera vart við sig í landinu.

Þetta er hin hliðin á innflytjendastraumnum frá austanverðri Evrópu, sem ráðamenn í Bretlandi og fleiri Vestur-Evrópuríkjum eru farnir að lýsa áhyggjum yfir.

Innflytjendurnir, sem streyma frá hinum fátækari ríkjum Evrópusambandsins til hinna ríkari, hafa margir hverjir verið mikilvægir starfskraftar í heimalandinu. Svonefndur „spekileki“ er farinn að verða þar vaxandi vandamál og munar þar mestu um lækna, upplýsingatæknifólk og verkfræðinga.

Frá þessu skýrir þýska dagblaðið Die Welt á vefsíðum sínum.

„Þetta er ferli sem byrjaði strax fyrir sex eða átta árum,“ hefur Die Welt eftir Láslzló Harsányi, ungverskum skurðlækni sem er prófessor við Semmelweis-háskólann í Búdapest og yfirmaður skurðlækningadeildar háskólasjúkrahússins.

Hann segir að allir læknar sem eru á miðjum aldri og sjá sér fært að flytja úr landi séu nú þegar farnir frá Ungverjalandi. Hann segir ungversk sjúkrahús farin að finna illilega fyrir þessum læknaskorti.

Þá sé farið að skorta verulega menntað starfsfólk til annarra starfa á sjúkrahúsum í Ungverjalandi, svo sem hjúkrunarfræðinga og aðstoðarfólk á skurðstofum. Erfiðast sé ástandið á sjúkrahúsum úti á landi eða í úthverfum Búdapest, en skást á Semmelweis-háskólasjúkrahúsinu í Búdapest, sem telst hið besta í landinu.

Sams konar ástand er að finna í flestum faggreinum hinna fátækari aðildarríkja ESB í austanverðri álfunni.

Fólksflóttinn frá Rúmeníu hefur á síðustu árum verið það stórtækur að íbúafjöldinn er kominn niður fyrir 20 milljónir, en þar bjuggu áður 23 milljónir manna.

„Maður væri brjálaður að gera það ekki,“ er haft eftir Ungverjanum Albert Kottner, sem hefur sérhæft sig í uppsetningu á lyftum. Fagmenn í þeirri grein eru nánast horfnir í Ungverjalandi. „Hér í Ungverjalandi þénar maður með erfiðisvinnu 500 evrur á mánuði, en í Austurríki fær maður þúsund evrur á viku.“