„Er að fara til Auschwitz, kossar, þinn Heini“

Safn bréfa, minnispunkta og ljósmynda frá Heinrich Himmler hafa nú verið birt en gögnin varpa ljósi á einkalíf mannsins sem skipulagði helförina. Frá þessu greinir á vef Telegraph.

Bréf Himmler til fjölskyldu sinnar spanna tímabil frá frá árinu 1927 til 1945, nokkrum vikum áður en hann framdi sjálfsmorð. Die Welt birtir gögnin en þau veita innsýn í heimilislíf nasistaforingjans.

Sambærileg gögn annarra nasista hafa glatast en Adolf Hitler, Hermann Göring og Joseph Göbbels náðu allir að eyða slíkum gögnum fyrir dauða sinn. 

Í júlí 1941 skrifaði Himmler eiginkonu sinni og baðst afsökunar á því að hafa gleymt brúðkaupsafmæli þeirra hjóna. „Mér þykir leitt að hafa gleymt afmælinu okkar í fyrsta skipti. Það er frekar mikið að gera hjá okkur þessa dagana,“ skrifar Himmler og bætir við að baráttan gangi erfiðlega, „sérstaklega hjá SS-sveitunum.“

Bréf Himmlers til fjölskyldu sinnar þykja óformleg og varpa ljósi á fjölskyldumanninn Himmler. Í júlí 1942 ritaði hann eiginkonu sinni bréf en í því stóð: „Er á leiðinni til Auschwitz, kossar, þinn Heini.“ 



Dóttir hans varaði við árás á Rússa

12 ára gömul dóttir Himmlers, Gudrun, sendi föður sínum bréf þegar hún frétti af innrás nasista í Rússland. „Það er skelfilegt að við séum í stríði við Rússa, þeir eru bandamenn okkar,“ skrifar Gudrun og bætir við að Rússland sé afar stórt og því muni baráttan ganga erfiðlega.“



Ótuktar eiginmaður

Í bréfaskiptum hjónanna árið 1928 skrifaði Margaret, eiginkona hans: „Mikið er ég heppin að eiga svona mikla ótukt (e. wicked) fyrir eiginmann, sem elskar ótuktareiginkonu sína svona mikið."



Jaques Schuster, þýskur blaðamaður, hefur eitt mörgum mánuðum í að sannreyna uppruna bréfanna og þykir ekki vafi á því að Himmler hafi ritað bréfin.