Robben: Fyrir þetta lifir maður

„Þetta er ástæðan fyrir því að maður spilar fótbolta. Fyrir þetta lifir maður,“ sagði Arjen Robben eftir 5-1 sigur Hollands á Spáni á HM í kvöld.

Robben var magnaður í leiknum og skoraði tvö mörk í leiknum, rétt eins og Robin van Persie.

„Við getum notið þessa sigurs en ég hafði alltaf trú á okkar mannskap. Við vitum vel hvað við getum. Við þurfum bara að hafa trú á okkur.“

Vicente del Bosque, landsliðsþjálfari Spánar, segir að hans menn geti aðeins sjálfum sér um kennt.

„Við töpuðum og því verðum við að taka. Við gerðum mörg mistök í síðari hálfleik og Hollendingar gengu á lagið,“ sagði þjálfarinn.