Ennþá von í kjaradeilu grunnskólakennara: "Menn fá alveg að taka rækilega eftir okkur á morgun ef á þarf að halda"

Allt stefnir í sólarhringsverkfall grunnskólakennara á morgun, en þeir munu leggja niður störf ef ekki nást samningar í kvöld. Boðað hefur verið til baráttufunda víða um land á morgun komi til vinnustöðvunar og formaður Félags grunnskólakennara segir að kennarar muni þá láta heyra rækilega í sér.

Samninganefndir grunnskólakennara og Sambands íslenskra sveitarfélaga funduðu fast að miðnætti í gærkvöldi og hófu aftur viðræður í morgun. Fundað hefur verið í húsakynnum ríkissáttasemjara í allan dag en engin niðurstaða liggur fyrir. Óvissa ríkir því um vinnudag morgundagsins hjá 43 þúsund grunnskólanemum.

Ólafur Loftsson, formaður Félags grunnskólakennara, segir að þokast hafi í samningsátt síðustu daga en launaliðurinn sé eftir. „Við erum að tala saman og þá er ennþá von. Það er ekkert sérstakt sem bendir til þess að þetta hafist ekki en það er heldur ekkert sérstakt sem bendir til þess að þetta takist,“ segir hann.

Frekari vinnustöðvanir hafa verið boðaðar í næstu og þarnæstu viku en allherjarverkfall er ekki inni í myndinni eins og er. „Það er ekki útilokað að þetta hafist í kvöld en það er dálítið eftir og fólk verður bara að fylgjast með fréttum og heimasíðum í kvöld og í fyrramálið ef svo ber undir,“ segir hann.

Búist þið við að vera hérna í nótt?

„Ef á þarf að halda þá gerum við það. Við gerum allt sem við getum til að forða okkur frá vinnustöðvun,“ segir Ólafur.

Baráttuhugur er í kennurum og útifundir hafa verið skipulagðir víða um land á morgun komi til vinnustöðvunar, meðal annars á Ingólfstorgi klukkan tíu í fyrramálið. „Við munum standa saman eins og áður og menn fá alveg að taka rækilega eftir okkur á morgun ef á þarf að halda,“ segir Ólafur að lokum.