Ólympíuvellir í Aþenu í algerri niðurníðslu tíu árum eftir leikana

Tíu ár eru í dag síðan Ólympíuleikarnir í Aþenu voru settir. Margir spyrja sig hvort leikarnir hafi verið of stór biti fyrir grískan efnahag á sínum tíma, en fjöldi þeirra bygginga og leikvanga sem nýttir voru á leikunum eru nú í algerri niðurníðslu.

Þó að fáir kenni leikunum einum um þær miklu efnahagsþrengingar sem Grikkir hafa gengið í gegnum síðustu ár, þá vilja margir meina að Grikkir hafi ekki nýtt sér þann meðbyr sem við þeir fengu árið 2004. Gríski lyftingamaðurinn og gullverðlaunahafinn Pyrros Dimas og situr nú á þingi fyrir gríska sósíalista er einn þeirra. „Við gerðum einfaldlega mestu mistök í sögu okkar. Við slökktum á öllu, lokuðum leikvöngunum, leyfðum þeim að grotna niður og allt stöðvaðist þar,“ segir Dimas í samtali við AP.

Dimas segir Grikki hafa varið miklum fjárhæðum í verkefni sem hefur nú verið lokað og grotna niður. „Það voru byggingar sem hefðu átt að kosta tvær eða þrjár milljónir evra, en urðu skyndilega svo stór að þau kostuðu 13 eða 14 milljónir. Það var engin stjórn á neinu.“

Fáir leikvangar sem notaðir voru á leikunum í Aþenu hafa öðlast nýtt líf eftir að leikunum lauk. Badmintonhöllinni var breytt í tónleikahöll, en borðtennis- og fimleikahöllin eru báðar til sölu. Þá hefur strandblakvöllurinn og keppnisbrautin fyrir róður nær ekkert verið notaðar. Flestir leikvangarnir standa einfaldlega auðir.

Talið er að leikarnir hafi kostað um 8,5 milljarða evra, tvöfalt meira en upphaflega var áætlað.

Nýlegar myndir sýna greinilega hvernig leikvangar og ólympíuþorpið hafa drabbast niður. Enn fleiri myndir af leikvöngum og Ólympíuþorpinu má meðal annars sjá á Baltimore Sun.