Kosningar undir vopnaeftirliti

Vopnaðir menn í herklæðum fylgdust grannt með íbúum í austanverðri Úkraínu, sem komu til þess að greiða atkvæði í gær.

Aðskilnaðarsinnar efndu til þessara kosninga viku eftir að almennar þingkosningar voru haldnar í Úkraínu. Um það bil helmingur landsvæðis tveggja héraða er á valdi uppreisnarmanna, sem vilja aðskilnað héraðanna frá Úkraínu og helst sameiningu við Rússland.

Hvorki Úkraínustjórn né Vesturlönd almennt hyggjast taka mark á niðurstöðum kosninganna í gær.

Óvíst er um kosningaþátttöku, en um 350 kjörstaðir voru opnir í gær. Um það bil 1,4 milljónir manna eru sagðar hafa kosningarétt.

Þrátt fyrir að leiðtogar uppreisnarmanna hafi í september fallist á vopnahlé, þá geisa enn átök á svæðinu. Nánast daglega kemur til skotbardaga eða annarra átaka.