Fátt kemur í veg fyrir verkfall

Það er fátt sem bendir til þess komið verði í veg fyrir að verkfall lækna hefjist 27. október. Mikið ber í milli hjá deiluaðilum og enginn fundur hefur verið boðaður. Rafræn kosning hjá Læknafélagi Íslands og Skurðlæknafélagi Íslands stendur yfir og er niðurstöðu að vænta í næstu viku.

Sigurveig Pétursdóttir, formaður samninganefndar lækna, segir að hún eigi ekki von á öðru en að læknar samþykki að boða til verkfalls. „Ég geri fastlega ráð fyrir því og ég er bjartsýn á að þeir samþykki þessa beiðni þó að það sé okkur ekki ljúft að fara í verkfall.“

Sigurveig segir að takmarkað umboð samninganefndar ríkisins til að mæta kröfum lækna torveldi viðræður. Fast sé haldið í þá stefnu stjórnvalda sem sett var í byrjun árs að miða eigi við 2,8 prósenta hækkun hjá opinberum starfsmönnum. Þau takmörk séu hins vegar fokin út í veður og vind og forsendur fyrir slíkum samningum löngu brostnar.

„2,8-3 prósent duga ekki því við vitum að það er flótti lækna frá landinu og við læknar vitum um hvað málið snýst. Við verðum að sporna við því og það verður ekki gert öðruvísi en að hækka laun,“ segir Sigurveig.