Fjöldamorðin jafnast á við morðin á Tiananmen-torgi

Fjöldamorðin á mótmælendum í Egyptalandi á síðasta ári eru ein þau verstu í sögunni og jafnast á við morðin á mótmælendum á Tiananmen-torgi í Peking árið 1989.

Þetta fullyrða mannréttindasamtökin Human Rights Watch, sem hafa sent frá sér harðorða skýrslu um atburðina í Kaíró sumarið 2013.

Í skýrslunni eru egypsk stjórnvöld sökuð um glæpi gegn mannkyni. Sameinuðu þjóðirnar eru hvattar til þess að hefja rannsókn á fjöldamorðunum, þar sem athyglinni verði einkum beint að Abdel Fattah el Sissi, sem nú er orðinn forseti, og um það bil tíu yfirmönnum í öryggissveitum hans.

Samtökin segja her og lögreglu hafa orðið að minnsta kosti 817 mótmælendum að bana eftir að Mohammed Morsi forseta var steypt af stóli í byrjun júlí.