Réttarhöldin sögð vera skrípaleikur

Þrír fréttamenn frá fréttastöðinni Al Jazeera voru í gær dæmdir í sjö ára fangelsi fyrir tengsl við hryðjuverkastarfsemi í Egyptalandi. Þeim var gefið að sök að hafa stutt Bræðralag múslima og flutt falsaðar fréttir af mótmælum í landinu á síðasta ári.

Réttarhöldin hafa verið harðlega gagnrýnd fyrir að vera tilraun til að koma höggi á fréttastöðina, sem egypsk stjórnvöld hafa ítrekað sakað um hlutdrægni.

Mannréttindasamtökin Amnesty International kalla réttarhöldin skrípaleik og segja saksóknurum ekki hafa tekist að koma með eina einustu staðreynd máli sínu til sönnunar. Fréttamennirnir þrír virtust furðu lostnir þegar dómurinn var kveðinn upp. Ættingjar þeirra í réttarsalnum komu vart upp orði.

„Þeir munu fá að greiða fyrir þetta,“ sagði Mohamed Fahmy, einn fréttamannanna þriggja. „Sá einhver minnstu sannanir gegn þeim?“ spurði móðir hans, Wafa Bassiúni.

„Hvern drap hann?“

Fahmy er egypsk-kanadískur, en hinir tveir eru Peter Greste frá Ástralíu og Baher Mohammed frá Egyptalandi.

„Við erum furðu lostin, algerlega furðu lostin vegna þessa dóms,“ sagði Julia Bishop, utanríkisráðherra Ástralíu, við blaðamenn í Canberra. „Með þessum dómi er ekki beinlínis verið að senda heiminum þau skilaboð að Egyptalandi sé að takast að breytast í lýðræðisríki.“

John Kerry, utanríkisráðherra Bandaríkjanna, hafði á sunnudag reynt að fá egypska ráðamenn til þess að virða reglur lýðræðis og réttarríkis. Hann sagði að Abdel Fattah el Sissi forseti hefði sýnt mikinn áhuga á að taka réttarkerfið til endurskoðunar.

El Sissi hefur verið valdamesti maður Egyptalands frá því hann steypti Mohammed Morsi, lýðræðislega kjörnum forseta landsins, af stóli á síðasta ári.

Bandaríkin eru raunar nýbúin að samþykkja að veita Egyptum 572 milljónir dala í hernaðaraðstoð. Bandaríkin hafa einnig lofað að útvega Egyptum tíu herþyrlur af Apache-gerð. Þessi hernaðaraðstoð kemur til viðbótar 200 milljónum dala í efnahagsaðstoð frá Bandaríkjunum.