Borgarslagur um Meistaradeildartitilinn

Atletico Madrid og Real Madrid spila í kvöld sögulegan úrslitaleik í Meistaradeildinni þegar nágrannarnir mætast á Leikvangi ljóssins í Lissabon. Þetta er fyrsti borgarslagurinn í úrslitaleik Meistaradeildarinnar. Leikurinn hefst klukkan 18.45 að íslenskum tíma og verður í beinni á Stöð 2 Sport.

Atletico Madrid vann spænsku deildina um síðustu helgi í fyrsta sinn frá 1996 en getur þarna unnið Meistaradeildina í fyrsta sinn. Strákarnir hans Diegos Simeone tóku deildina fyrir framan nefið á Barcelona og geta nú gert það sama við hina risana á Spáni.

Það yrði sárt fyrir stóra bróður í Madríd. Nágrannarnir í Real eiga nefnilega möguleika á því að verða fyrsta félagið til að vinna Evrópukeppni meistaraliða í tíunda sinn.

„Eftir að við unnum þann níunda í Glasgow voru menn farnir að spyrja okkur um þann tíunda strax daginn eftir,“ sagði Iker Casillas, fyrirliði Real Madrid í dag og sá eini sem spilaði þennan úrslitaleik fyrir tólf árum. Undanfarin ár hefur öllu verið tjaldað til á Santiago Bernebau til að setja saman Evrópumeistaralið.

Stærstu stjörnur liðanna tveggja verða vonandi leikfærar í kvöld. Cristiano Ronaldo er klár eftir að hafa misst af síðustu tveimur leikjum og Atletico-menn beita öllum aðferðum til þess að Diego Costa verði með í kvöld. Costa þarf samt á litlu kraftaverki að halda.

„Það verður algjör draumur fyrir mig að spila úrslitaleik í Portúgal,“ skrifaði Cristiano Ronaldo á Twitter-síðu sína í gær en hann er þegar búinn að setja markamet með því að skora sextán mörk í Meistaradeildinni á þessari leiktíð. Ronaldo er búinn að skora 51 Meistaradeildarmark fyrir Real en fær nú loksins að spila úrslitaleik með liðinu og það á „heimavelli“.

Hjörtur Hjartarson hitar upp fyrir úrslitaleikinn á Stöð 2 Sport (hefst klukkan 17.45) þar sem hann fær til sína góða gesti og Guðmundur Benediktsson mun svo lýsa leiknum af sinni alkunnu snilld.