Öll einkenni "Shaken baby syndrome“

Þýskur réttarmeinafræðingur, Regina Preuss, bar í morgun vitni í máli manns sem er sakaður um að hafa hrist barn sitt til dauða. Preuss taldi, eftir krufningu, að allir áverkar á barninu bentu til þess að það hafi verið hrist til dauða.

Aðalmeðferð í máli karlmanns á þrítugsaldri, sem ákærður er fyrir að hafa hrist fimm mánaða dóttur af slíkri hörku að hún lést nokkrum klukkustundum síðar, hófst í Héraðsdómi Reykjavíkur í dag.

Umrætt atvik átti sér stað þann 17. mars á síðasta ári þegar maðurinn var einn heima með dóttur sinni. Hann var í kjölfarið úrskurðaður í gæsluvarðhald og í framhaldinu af því úrskurðaður í farbann þann 26. mars.

Preuss, sem er búsett hér á landi en hefur starfað sem réttarmeinafræðingur í heimalandi sínu, ræddi um hið svokallað „Shaken baby syndrome“, en hún var spurð um það bæði frá saksóknara og verjanda.

„Eru þetta dæmigerð einkenni „Shaken baby syndrome?“ spurði saksóknari.

Preuss sagði mikið hafa verið rætt um „shaken baby syndrome“ og ritað og hvort það sé heppilegt hugtak. „En þegar spurningin er hver orskökin hefur verið fyrir þessa áverka barnsins þá á þetta allt við. Það er hægt að færa rök fyrir því að einstakir áverkar geti átt sér aðrar skýringar. En áverkarnir í heild eru dæmirgerð einkenni „Shaken baby syndrome“.

Verjandi mannsins, sem er sóttur til saka, spurði einnig út í „shaken baby syndrome“ og hvort Preuss hefði sérþekkingu á því. Preuss velti því fyrir sér hver skilgreiningin á sérfræðingi væri. Hún sagðist vera réttarmeinafræðingur og hafi fengist við nokkur svona tilvik í Þýskalandi.

„Kannastu við að þetta fyrirbæri sé umdeilt í læknavísindum?“

„Ekki almennt. Það er óumdeild að þetta fyrirbæri sé raunverulega til en það er vissulega um það rætt og ritað. Hversu mörg auðkenni þurfa að vera fyrir hendi svo um sé að ræða þetta tiltekna „syndrome“ og til að útiloka aðrar mögulegar orsakir?“ svaraði Preuss.

Verjandinn spurði hana svo út í kenningar tengdar „Shaken baby syndrome“ og hvort einkenni þess gætu verið þau sömu og einkenni blóðstorknunarsjúkdóms. Preuss útilokaði að um blóðstorknunarsjúkdóm væri að ræða, því einkennin myndu koma fram í öllum líkamanum, ekki bara í kringum höfuð.



Útilokað að barnið hafi verið hrist óvart

Þýski meinafræðingurinn var spurður að því hvort möguleiki væri á að barnið hefði verið hrist óvart. Hvort gáleysi gæti hafa valdið slíkum áverkum.

Meinafræðingurinn útilokaði það. Hér væri verið að ræða um svo massíva áverka að það væri enginn möguleiki að þeir gætu hafa myndast í leik eða væri slys í dagsins önn. Miklu ákveðnari og meiri kraft þyrfti til að kalla fram áverki sem þessa.

Spurt var í framhaldinu hvort hægt væri að segja eitthvað til um hve langur tími hefði liðið frá því að barnið fékk áverka og þar til barnið fór að missa meðvitund.

Sú þýska sagði ómögulegt að fullyrða um það með algjörri nákvæmni. Það væri hins vegar augljóst, í tilfelli þess að ungabörn væru hrist, að atferli barnsins breytist. Það geti verið slappt, máttleysislegt eða grátið áberandi mikið. Möguleiki væri á einkennalausum tímabilum en það ætti einkum við um eldri börn. Því yngri sem börnin væru því ólíklegra væri að um einkennislaus tímabil væri aðræða á milli áverka og afleiðinga þeirra.

Líklegast telur sú þýska að barnið hafi í fyrstu grátið en svo sofnað í kjölfarið. Ólíklegt sé að barnið hafi grátið í lengri tíma undir áverkum sem þessum.