Myrtar í afbrýðiskasti

Lík hinnar 19 ára Maria Jose Alvarado, ungfrú Hondúras, fannst ásamt líki 23 ára systur hennar, Sofiu, í gær, eftir umfangsmikla leit frá því á síðasta fimmtudag. Þær sáust síðast á leið úr samkvæmi síðastliðið fimmtudagskvöld, er þær stigu upp í bíl Plutarco Ruiz, kærasta sofiu.

Mikið rifrildi hófst á milli kærustuparsins, eftir að hún hafði dansað við ókunnugan mann, sem endaði með Ruiz tók upp byssu og skaut Sofiu. Hann skaut Maríu tvisvar sinnum í bakið þegar hún hljóp í burtu. Þetta hefur AP fréttaveitan eftir talsmanni lögreglunnar. Ruiz leiddi lögreglumenn að líkum systranna í gær.

Móðir systranna segir Ruiz hafa hringt í sig á föstudagsmorguninn og þóst vera áhyggjufullur. Hann sagði þær hafa farið upp í bíl, með mönnum sem hann þekkti ekki kvöldið áður. Hún sagði dætur sínar hafa átt auðvelt með að treysta fólki.

„Þær voru ekki góðar í að meta fólk í kringum sig. Þær voru bara vingjarnlegar og voru að umgangast fólk sem þær höfðu ekki þekkt lengi,“ hefur AP eftir Teresu Munoz.

Morð þeirra systra hefur vakið athygli á því vandamáli sem ofbeldi gegn konum er í Hondúras. Morðum á konum hefur fjölgað um 263 prósent frá árinu 2005.

„Ofbeldi gegn konum og stúlkum er gífurlega stórt vandamál,“ segir Adriana Beltran hjá Sameinuðu þjóðunum. „Fjölmargar konur láta lífið á þennan hátt, en þar sem þær eru ekki frægar, fá þau mál ekki mikla athygli og engum er refsað.“